மெமரி லீக்

வியாழமாற்றம் 03-01-2013 இந்தமுறை augmented reality சம்பந்தமானது. இப்பெல்லாம் நமக்கு கமெண்ட் போட்டு அலுத்துவிட்டது. எத்தனை நாளைக்குத் தான் நல்லா இருக்கு எண்டு போடுவது. அதனால் வெறும் like உடன் நிறுத்திவிடுவேன். ஆனால் அதையும் மீறி ரொம்பவே நன்றாக இருக்கிறது, கமெண்ட் போடுவம் எண்டு வெளிக்கிட்டால் நீண்டு நீண்டு பிறகு அதுவே ஒரு பதிவாகிவிடுகிறது.

இம்முறை வியாழமாற்றம் வாசித்தபோது, முதலாவதாகத் தோன்றியது என்னய்யா ப்ரோக்ராம் பண்ணியிருக்கிறீங்க/றாங்க எண்டு தான். பலருக்கு இது ஒரு அர்த்தமில்லாத கேள்வியாகத் தோன்றும். ஆனால் நெட்வொர்க் அல்லது சிஸ்டம் சைடில் இருப்பவர்களுக்குத்தான் அதன் வலி புரியும். 

ஐந்து வருடங்களுக்கு முன்பு இப்படித்தான் ஒரு மேஜர் ப்ரொஜெக்டில் மாட்டுப்பட்டிருந்தபோது என்னதான் திருகுதாளம் பண்ணியும் அந்த சிங்கப்பூரின் முதலாவது சர்ச் என்ஜின் வெப்சைட் லோட் ஆவதற்கு 30s எடுத்தது. ஒரே query யை கூட சிறிது நேரத்தின் பின் இரண்டாவது முறை கொடுக்கும்போதும் கூட அதே நிலைமை தான். உடனே ப்ரோக்ராமேர்ஸ் எல்லோரும் ஒன்று சேர்ந்தாப்பல நெட்வொர்கில் தான் பிழைஎன்றார்கள். switches, routers, enclosure switches, load balancers, firewall எண்டு எல்லாத்திலையும் என்னதான் troubleshoot பண்ணிப் பார்த்தும் ஒண்டுமே கண்டுபிடிக்க முடியவில்லை. எல்லாமே GB/fiber port.. லூப் எங்காவது மாட்டினால் தான் உண்டு. கடைசியா வேறை வழியில்லாம ஒவ்வொரு Application ஆக ஆராயப்போனா அதை develop பண்ணினவங்கல்லாம் ஒரேமாதிரி சிம்பிள் ஆக சொன்ன ஒரே பதில் "my application wont take more than 5sec". processing delay க்கு காரணம் சிஸ்டம்.

இப்போ நெட்வொர்கில் பிழை இல்லையென்றானதும் அவர்கள் தாவியது சிஸ்டத்க்குத் தான். ஸ்பீட்/storage காணாது. எவ்ளோ allocate பண்ணினாலுமே இன்னும் இன்னும் வேணும் எண்டுகொண்டிருந்தார்கள். அவர்களுக்காக இருந்த நூற்றுக்கும் மேற்பட்ட G3/4/5 Servers மற்றும் SAN storage, டைரக்ட் attached storages இல் grid, cloud என அந்த நேரம் நமக்குத் தெரிந்த அனைத்தையும் முயன்று களைத்த பின்பு ஒருநாள் application சைடு project manager வந்து சொல்கிறார்.. "சில applications இல் நிறைய memory leak இருந்தது. fix பண்ணியாச்சு. இப்ப ஒருக்கா ட்ரை பண்ணி பாப்பமா?" எண்டு.. உடனே எனது வாயில் வந்து சொல்லாமல் விட்டது "what the heck is that?".

இங்கு பிரச்சினை என்னவென்றால் "nobody is seeing the big picture". ஒரு search க்கு results கொண்டு வாறத்துக்கு குறைந்தது இத்தகைய ஐந்து/ஆறு complex applications run பண்ண வேண்டியிருக்கும். அந்நியன் பாணியில் சொன்னால் "ஒவ்வொருத்தரும் ஐந்தைந்து செக்கன்களாக மொத்தம் 25-30sec களை ஒவ்வொரு search processing இலும் கொள்ளையடிக்கிறார்கள்." ஆனால் end user கம்ப்ளைன் பண்ணுவது. network slow. இத சொன்னா யாருமே புரிஞ்சுக்க மாட்டாங்க. பாவமைய்யா நாங்க.. எவ்ளோ நாளைக்குத்தான் வலிக்காத மாதிரியே நடிக்கிறது.

ஹிமாலயா கிரியேசன்ஸ் 6

ஹிமாலயா கிரியேசன்ஸ் யாழ்ப்பாணத்தில் ஒரு தனியார் நிறுவனமாக உருவாக்கம் பெற்று சில நாட்களே ஆகியிருந்தன. முதலாவது நிகழ்ச்சி, AAA Movies International அனுசரணையில் Himalaya Creations Pvt Ltd நிறுவனத்தினரால்  நடாத்தப்பட்ட "ignite : Empowering the short-filmmakers".. பட்டுத்துணி விரிக்கப்பட்ட வட்டமேசைகள்.. சுற்றிவர அழகிய நாற்காலிகள்.. மேடை விளக்குகள்.. சிறந்த ஒலியமைப்பு.. என்று களைகட்டிய அந்த இடம்.. யாழ்ப்பாணமும் பல வெளியிடங்களைப் போலவே அதி நவீன வசதிகளுடன் கூடிய conference halls உடன் அதிமுக்கிய நிகழ்வுகளைக் கொண்டு நடத்துவதற்குத் தயாராக இருக்கிறது என்பதைக் கட்டியம் கூறிற்று. 

பல வளர்ந்துவரும் கலைஞர்கள் கௌரவிக்கப்பட்ட Himalaya Creations நிறுவனத்தின் இந்த முதலாவது ignite நிகழ்வில் தான் வடபகுதி திரைப்படக்கலை சார் கலைஞர்களை ஊக்குவிக்கும் பொருட்டு சங்கம் ஒன்றை உருவாகுவதற்கான தீர்மானம் எடுக்கப்பட்டு அதன் தலைவராக ஈழத்தின் புகழ்பூத்த திரைப்பட இயக்குனர் திரு. ந.கேசவராஜன் அவர்களை ஹிமாலயா கிரியேசன்ஸ் தலைவரான திரு. ரெ.துவாரகன் அவர்களால் முன்மொழியப்பட அனைவராலும் ஏகமனதாக ஏற்றுக்கொள்ளப்பட்டது. கட்டி முடிக்கப்பட்டு ஒருசில நாட்களே ஆனா நிலையில் இத்தகைய ஒரு வரலாற்றுச் சிறப்புமிக்க நிகழ்வை நடத்திவைத்த இடம்.

"இந்த விளம்பரத்தில் ஒரு சிறுபகுதி இருக்கு. நடிக்க முடியுமா?" என்று கேட்டபோது உடனே "காதல் அணுக்கள்" பாடலில் வரும் ரஜினி கெட்அப்பில் Guitarம் கையுமாக வந்து  நின்ற பிருந்தா முதற்கொண்டு இடையில் வரும் பிறந்தநாள் கொண்டாட்டம், கடைசி frame இல் வரும் விளக்குகள் மாறிமாறி எரியும் காட்சிவரை இந்த விளம்பர ஷூடிங்க்கு பின்னல் நடந்த நிகழ்வுகள் அனைத்துமே சுவாரசியமானவை. 

போஸ்ட் புரொடக்சனில் வழமைபோலவே துசிகரனினதும் சுகன்யனினதும் உழைப்பு அபாரமானது. AR ரஹ்மானின் மியூசிக் Academyயில் படிப்பதற்கு செலக்ட் ஆகிவிட்ட மகிழ்ச்சி சுகனியனின் கம்போசிங்கில் தெரிகிறது. :)

இச்சமயத்தில் எமது வளர்ச்சிக்கு ஆதரவு தந்துவரும் அனைவருக்கும் எமது மனமார்ந்த நன்றியைத் தெரிவித்துக்கொண்டு உங்கள் அனைவருக்கும் ஹிமாலயா கிரியேசன்ஸ் சார்பில் இனிய ஆங்கில புத்தாண்டு நல்வாழ்த்துக்களைத் தெரிவித்துக்கொள்கிறோம். 

இனிய புத்தாண்டு நல்வாழ்த்துக்கள்

ரெண்டு வரியில் புத்தாண்டு வாழ்த்துக்கள் என்று முடித்துவிடலாம் என்று தான் முதலில் நினைத்தேன். ஆனால் அதில் என்ன சுவாரசியம் இருக்க முடியும் என்று தோன்றவே கொஞ்சம் நீட்டி முழக்க அதுவே ஒரு பதிவாக வந்துவிட்டது. 

2012, ஓஷோவின் The Art of Dying உடன் தொடங்கியது. பயணம் இலங்கையை நோக்கியது. கொடுக்கப்பட்ட விலை சற்று அதிகம் என்றாலும் தொலைந்துபோன பக்கங்கள் சில மீட்க்கப்பட்டன. பல கேள்விகளுக்கான பதில்கள் கிடைக்கப் பெற்றன. அனந்தனுடனான இந்தியாவுக்கான இரண்டாவது ஆன்மீகப் பயணம் பல இனிய அனுபவங்களைப் பெற்றுத் தந்தது. 

சாதனைகள் என்று சொல்லப்போனால், ராமர் பாலம்கட்ட அணில்குஞ்சும் உதவியதுபோல யாழின் வரலாற்றுச் சிறப்புமிக்க இரு பெரும் ஆரம்பங்களில் துணை நின்றிருப்பது மிகுந்த மகிழ்ச்சியைத் தருகிறது. என்னதான் ஆயிரம் கனவு கண்டாலும் அதை திறமையாக செயல் படுத்துவதற்கு தகுந்த அணியும் தேவை. அந்தவிதத்தில் Yarl IT Hub மற்றும் Himalaya Creations Pvt Ltd இரண்டிலும் ஏதோவொருவகையில் ஊக்குவிக்கும் காரணியாக அமைந்ததில் மிகுந்த மகிழ்ச்சி. இவையிரண்டுமே இந்த குறுகிய காலத்தில் யாழில் இன்றைய சூழலில் என்னவெல்லாம் நடத்தமுடியும்/சாதிக்க முடியும் என மற்றவர்கள் நினைத்துப் பார்க்க முடியாத உயரங்களை தொட்டு நிற்கின்றன. 

Yarl IT Hub ... The first year review by Sayanthan

Himalaya Creations Projects 2012

பல தவிர்க்க முடியாத சூழ்நிலைகளால் என்னால் நேரிடையாக பங்களிக்க முடியாது போனமைக்கு மன்னிப்பு கோரிக்கொண்டு இந்நிறுவனங்கள் மேலும் மேலும் வளர எனது மனதார்ந்த வாழ்த்துக்களை இச்சமயத்தில் தெரிவித்துக் கொள்கிறேன். 

இறுதியாக.. கடந்த பன்னிரண்டு மாதங்களாக எம்முடன் கூடநின்று உழைத்தோர், தள்ளிநின்று எள்ளி நகைத்தோர், பாராட்டினோர், குறை/நிறை விளம்பினோர், புகழ்ந்தோர் இகழ்ந்தோர், அறிவுரை தந்தோர், வேலை தந்தோர், வேலை வாங்கினோர், வெட்டியாய் வம்புக்கிழுக்க அலைந்தோர், மனதார வாழ்த்தினோர் என அனைத்து நெஞ்சங்களுக்கும் இவ்வருடமும் இனிய ஆண்டாக அமைய எனது நல்வாழ்த்துக்கள். 

பிற்குறிப்பு: சென்ற நான்கு வருடகாலமாக திட்டமிடப்பட்ட பயணம் இவ்வருடம் கைகூடப்போகிறது. இம்முறை எதிர்த் திசையில்.. அதுபற்றிய மேலதிக விவரங்களை வெகுவிரைவில் அறியத் தருகிறேன்.